Cieszyńskie Szkubaczki / Kaj indzi inkszy, u nas po naszymu

Cieszyński Ośrodek Kultury „Dom Narodowy” – COK zaprasza na kolejne wydarzenie folklorystyczne z cyklu Kaj indzi inakszy – u nas po naszymu.

Łoblyczcie sie po starodownu w szatki i fortuszki.
Weźcie se gnotki, kuloki i małe lawory miyndzy nogi.
Bedzie cosik fajnego na zómb.
Bedymy śpiewać i możne aji tańcować.

Wydarzenie uświetnią:
– Zespół Regionalny „Strumień”
– Zespół Pieśni i Tańca Goleszów

Wstęp wolny
 Szkubaczki to było dycki świynto, bo sie sbiyrały gaździny s całej dziedziny i szły szkubać piyrzi. Tako gaździno, kiero szła na Szkubaczki sie nazywała szkubaczorka. Było tak, że Szkubaczki trefiły na jaki świynto, abo na jaki ważny dziyń, tóż baby sie musiały wypyrczyć i wystrojić, jakby szły na wiesieli. Na Szkubaczki sie szło do tej chałupy, kaj była dziołucha na wydaniu. Każdo dziołucha potrzebowała wiano, coby ji chłop nie wyczytoł, że ni mo nic. Tóż musiała mieć aspóń szumnóm pierzine i zogłowki. Tako młoducha, co miała pierzine a eszcze cosi w trówle to było cosi. Ale piyrsze było trzeja tóm pierzine usuć, tóż baby na szkubaczkach miały co robić.
Szkubaczki były s muzykóm, s potańcówkóm, abo bez. Jak były s muzykóm to były Szkubaczki do porzóndku i nazywały sie wyblyszczóne, szło se pojejść, wypić i eszcze pozwyrtać. Ślepo szkubaczka była bez potańcówki. Dycki gaździno – Mama młoduchy dowała po kósku buchty, a gazda musioł mieć w bintfelu narychtowanóm warzónke. Baby szkubały i śpiywały, a chłopi szli do szopy, abo do chlywa i tam se polywali. Chłapcy, kierzi uż poglóndali na dziołuchy, siedzieli pod oknami i podglóndali co sie robi w chałupie. Potym jednako dycki prziszeł gdosi s hóślami s gajdami zagrali i zaczynało sie tańcowani. Na szkubaczkach też dycki sie opowiadało o straszydłach, utopcach, abo o diobłach. Opowiadoł to starzik, abo starka – bo óni wiedzieli nejwiyncyj. Dzisio uż szkubaczek sie nie robi, bo pierzin sie uż nie suje, a zogłowki idzie kupić w magacynie, ale czasym by sie tak ludzie mógli ros za czas zynść, porozrzóndzać, pośpiywać a potym se potańcować. No ale cóż, kie wolóm siedzieć i dziwać sie do pudła…
– – –
CZ.11.2.45/0.0/0.0/15_003/0000332

Akce jsou pořádány v rámci projektu „Kaj indži inači – u nas po našymu. Lidová kultura Těšínského Slezska“. Projekt je spolufinancován Evropskou unií z prostředků Evropského fondu pro regionální rozvoj – Program Interreg V-A CZ-PL 2014-2020. / Wydarzenie jest orgnizowane w ramach projektu „Kaj indzi inakszy – u nas po naszymu / Kaj indži inači – u nas po našymu. Kultura ludowa Śląska Cieszyńskiego. Projekt jest dofinansowany przez Unię Europejską ze środków Europejskiego Funduszu Rozwoju Regionalnego w ramach Programu Interreg V-A Republika Czeska – Polska 2014-2020.